「政府醫院睇私家症」之「舉腳贊成」

引子

• 五月廿二日，下雨。恆生指數表演插水。私家醫生睇症指數同步急跌，並大幅低水。
• 百無聊賴，左眼撇見「師奶仔」姑娘埋首填表，原來趕交「白表」認購中國銀行(3988)。
• 即時火起，義正詞嚴指責她辦工時間處理私人事務，理應減薪。並順勢探討開源可能，建議立例（只是本診所私人草案）姑娘應串膠花（港島西區乃長江實業(001)膠花起家之地）或搣蝦殼（供應酒樓食肆，與阿婆搣無骨鳳爪異曲同工）以幫補診所收入。
• 「師奶仔」姑娘照例駁咀：「本姑娘只處理診所職務範圍內之事，人手過剩，大可炒咗新嚟嘅靚女阿May。至於揾錢，手作仔有乜用？睇病人，又唔見你發達？揾錢講效率，有乜嘢好得過炒股、抽新股？」

戲肉

• 婦人之見，卻一言驚醒，使本人度出一條解醫管局財困之絕橋。當真是吃飯睡覺都是禪，經濟學就在生活中。
• 獻上絕橋大綱，希望獲得賞識，賜予一官半職，則本人終可脫貧。
  
• 1. 政府醫院睇私家症無助解决醫管局財赤
• 美其名曰善用資源，就好似昨日的我叫姑娘無症睇時串膠花一般見識。因為怎樣介定空閒時間，和怎樣可以不影響正常運作，就似老夫子漫畫最常見標題般：「耐人尋味」。
• 舉一個例：傳聞某政府醫院暗渡陳倉，將原有私家病房南北打通，將謢士站居中而置，增建十張病床。問題出在病床增加五成（原有二十床位），但護士人數卻維持五人不變，即時造成「豬八戒照鏡」，兩面不是人的局面。
• 對外，病人可能得不到適當照顧，例如要自己沖好立克飲，則病人權益組織必定大造文章，羣起維護病人唔使自己沖好立克飲之權益。
• 反之，若病人竟然得到適當照顧，則那些「逢醫管局必反」的尊貴議員，便可借機叫醫管局瘦身，兼且「唔理三七二十一，買嚿豬頭搭嚿骨」，叫醫管局高層減薪。
• 對內，受影響的員工未必懂得顧全大局，雖未至於像「師奶仔」姑娘般照例駁咀，但心裏不快，則不能排除她們有另謀高就的想法，另覓像本診所提供，可照例駁咀，隨時行使「將在外、軍令有所不從」的優差。
• 反之，她們發光發熱，發揮小宇宙，應付自如，則其他熱血員工看在眼裏，必定悶在心裏。輕則她們工餘大做義工，四圍帶阿婆過馬路；重則在工作崗位自由發揮，胡亂沖好立克予非私家病人，豈非世界大亂？

• 2. 政府醫院一定要睇私家症
• 假如你即時反應是認為本人自相矛盾，則看官之水平，就如昨日的我般，未及做官。
• 須知道決策精要，在乎矛盾。況且「項莊舞劍，志在沛公」。
• 查香江開埠以來，政府醫療政策皆以服務市民為宗旨。醫管局其實是執行機構，由香江政府負責科水。就是最激進份子，也只是高呼醫院「服務」要收回成本，而未有作賺錢之異想。
• 如今醫管局之所以搞「開藥房」、「睇私家症」等小動作，其實是「賊佬試沙煲」，只要能蒙渾過關，則能海闊天空。
• 皆因若此等計劃得到認可，等同認可醫管局可改寫宗旨，以政府（亦即是市民﹞所科之水，投放於純賺錢項目。
• 到時大原則既變，下一步則是學「師奶仔」姑娘話齋，手作仔揾唔到幾多錢，當然應該資源最大效益化，首選發展地產，要求阿公撥地，搞一個醫管局港，再來一個西九醫療城。 也可分散投資，百花齊放，各取所需。例如效法一眾富豪，分認購新股之餅仔。甚或高薪聘請『任N招』，主持投資大局。當真是「止於你的想像力」。

• 3. 以腳投票，舉腳贊成
• 其他服務機構爭相效法：警隊增設收費私人保安、睇場。消防受僱於名嘴，代噴口水。懲教名正言順，代寄郵件包裹……果如是，則香江不難回復六十年代繁華光景。
• 到時一向自以為備受忽視的中產階層，不再嘈吱巴閉，改為走為上計，用腳投票。他們舉腳之後不再反對，等於贊成。亦可被視為曲線支持強勢領導也。

後記

• 因過度投資，昨天大手買入六合彩電腦飛一張，今日無症睇，即時現金短缺，唔夠錢抽中銀(3988)
• 雖然官職在望，但遠水怎能救近火？
• 威逼利誘，終說服「師奶仔」姑娘容許我入股十份一，合抽一手中銀。
• 等收錢。